أبيض ياورد

أبيض ياورد
*************

فى حضن الفل والياسمين
( قشطه وحليب )
لون قلب أبويا بتاع زمان !!
لون دعوة أمى الطيبه ساعة رضا
لون الندى ( من غيرشوائب عالقه )
أبيض ياورد
لون الضمــير .. من غيرعيوب
وبسمة الطفل البرئ ( من غير ذنوب )
بدر فــ تمامه
يهدى كل العاشقين جرعة أمل بعد الغروب
أبيض ياورد
تشبه جيوبى البردانين !!
لون السما فى عيون حبيبتى
توب زفاف فجرى الجديد
حلمى الوليد فى الشرنقه .. صوت الاذان
يفك حبل المشنقة قبل السجود !!
أبيض ياورد
تشبه ضفاير جدتى
ووحدتى وقت الخشوع
لون الدموع فوق الكفن
ع القبر نورك راح يزيد
فتح قووووووووووووووى
ت
ح
ت
ك
شهيد
*****************
كلمات / محمد فتحى السيد

مقلب زباله !!

مقلب زباله
*********
مليون صنم اختصاص اخر علام
واقفين طابور عمال يدور حوالين مقام
دى قوه عاميه قرع باميه الكل نام
مابين خيوط العنكبوت
بناطيل ......و...... جيبات
متعفرين بالتراث
وفوق راسم خطوط ///////////
ونقط ...........................
وعلامات استفهام ؟؟؟؟؟؟؟
وقف الرصيف انتباه
والعمر بيجرى سريعا مرش
جلابية ستى مقلوبه على كتفى
بكمامها العقده وشنيطه
<< ارشيف عمرى متلخبط >>
شهادات .. احلام .. وكرامة عليها زبل فيران
زبال همسلى فى ودنى
ارمى زبالتك يا ابنى .. عينتك عندى
قلبت جلابية ستى .. نفضت كرامتى
حطيتها فى جيبى المخروم
وبدأت الملم
تحت العرق
ايصالات على كمبيالات
عقود عمل عرفيه
محاضر اداب
ورق بفره
اعلانات تمليـــــــــــــــــك
<< مش ليك يامعفن >>
فوق الرصيف
زهور بلاستيك
ازايز بلاستيك
ودان بلاستيك
قلوب بلاستيك
جنب الرصيف
اكياس بلاستيك
مكتوب عليها << كفايه >>
علقت المقطف
ومشيت ورا الحمير من مقلب لمقلب
تحت اكوام الزباله الارض بور
سالت دموع العشش طرحت قصور
طلت من الشرفه الكبيره افواه كتيره
ت
ف
ت
على
الزبله
****************
محمد فتحى السيد

فارس الأحلام !!

فارس الأحلام !!
الخيط الأبيض يلمع فوق _ ست الحسن تفوق
الميه تطلى سحرها _ مين قدها
وعيون مها جوه المرايا ملحمه !!
تشيل قناديلها _ تطفى قنديلها _ تهرب من العشه
تطوى خطوتها الشوارع _ تتوه فى زحمة الميادين
تلتهمها كل عين
الواد يرقص الحاجب _ يشجب الشايب
البنت تتدلل
خاليه الشوارع م الفتات _ زحمه الاهات
اغصان تودع فى الورق
عصافير البطن بتصوصو فوق الرصيف _ يسكتها الرغيف
يشتد عودها تطوف _ الأمل ملفوف بخوف
م الحلق طالع صوت جميل ينادى ع المناديل
الشمس تهرب م السما _ الليل بيحزن انما _ الوقت فات
ساعة الرجوع تخنق متاعبها الخطاوى
وساعات تلبخ فى الدموع _ الفول بيقتل أى جوع
صعبه الساعات لما تطول تحت الغطا
الخطوه بكره ملخبطه _ ضاله الطريق
النوم جرئ _ سمكر عيون المها
فى الحلم سقط قلبها الفارس المجهول
على هامش البساتين جاى بالفرح طيران
فرش السنين ياسمين
على اليمين _ الورد يضحك للهوى
على الشمال _ الحور بتندب حظها
ابليس بينحت فى الطريق حبة حفر
اعوانه بيحشوا الأمل
جنح الحصان _ فلت اللجام
فارسها واقع فى الملل
جيوبه فضيت م الدفا !!
اتسربت فيها الرطوبه جمدت كل المشاعر _ ماعدش شاعر بالشروق
الخيط الأبيض يلمع فوق _ ست الحسن تفوق
تطوى خطوتها الشوارع _ تتوه فى زحمة الميادين
وتعود فى اخر الليل بالدم فوق منديل
ينعى انوثتها ويلعن فارس الأحلام
______________
محمد فتحى السيد

عقارب الساعه

عقارب الساعه
______________________
************************
الساعه داخله على الفين !!
على المينا بتلف عقارب
ومافيش قارب فى البحر سليم
غير واحد بس مليان عفاريت !!
عــ الشط بتتمط البراغيت وتنط شمال ويمين
العربى نايم على ضله وخيال الضل مغطيه
بيحلم بالكون افراح من غير مجروح
ولا طير مدبوح على اول قبله !!
ومافيش اسلاك ولا رجل بتقفز من شباك
على طفل برىء !!
ولا ايد بتربط فى الاوتاد طوق المخاليق
ولا صرخه بتطلع مكتومه
من قلب الحفره المردومه بروث الخنازير
لاشريط بيسف ولا بير بيجف
ولارفه ترف على الأوطان

************************
الساعه الفين واتنين
الجو دمار والريح بتكسر الاستنكار
والشوك من قلب الورد يفوت
الشجب يموووووووووووووت !!
عــ العربى بتتلم البراغيت من غير تصويت
ولا أى عبيط يطلع بقرار
السما بتعتم عــ الأخبار
وماعدش نهار بيبوح
الليل بيخبى الشمس فى حجره
وبــ رجله يشوووووط الحلم بعيد

************************
الساعه الفين وخمسه
الضلمه الدامسه بتمد مجالها
وتفوت عــ المادنه تهد هلالها وتبكى عيالها
ارهاب مشروووع بيشفى ضلوع ورقاب
وزعيم مخلوع من بعد ما داب

************************
الساعه الفين وسته
العـــــــــــــــــــــــالم سلطه
والشله الساقطه لساها قويه
بتقول للعربى شوف الأضحيه
على الباب الشرقى
كل عام وانتم بخير
جاى لسه كتير للعلم
والعربى غرقان فى الحلم
************************

حبيبتى أم الكون

حبيبتى أم الكون
******************
من أول النشأه
كل القلوب عاشقه
حبيبتى أم الكون

فى الفنا التالت
فتحنا ع التالت
عيارنا كان فالت حصلنا ميت مليون

خيرك يا أمى كتييييير
يكفى البشر والطير
وشبابنا أمله كبير يقابل المأذون

ف الغربه والترحال
شابوا ولسه عيال
بيجمعوا فى المال حتى ولو عربون

أكاله بطاله
والحاله بطاله
ولاحاجه منطاله د القبر صار مسكون

ياجدى ياخوفو
ابنى اتولد شوفه
مكتوب على كفوفه الطفل ده مديون

اسواقنا مفتوحه
لماريكا ولتوحه
ونفوسنا مجروحه وعلاجها مش مضمون

مايوهاتنا بكينى
وشاينا من الكينى
وبضايع الصينى من كل صنف ولون
ماليه حواريكى
طوابيييييير أهاليكى
والقمح امريكى فى دقيقك المطحون

افكارنا مسروقه
احلامنا محروقه
فرحتنا مشنوقه بحبل البنتاجون

من اول النشأه
كل القلوب عاشقه
حبيبتى أم الكون
*********************

رباعيات اكشن

السلام عليكم ورحمة الله وبركاته
من حبى للشاعر والاديب والفنان العملاق
صلاح جاهين
تأثرت به فى وقت من الاوقات فقررت ان اكتب
رباعيات اكشن
وها هى بعض رباعياتى

********************
1
يا أمه يا مدرسه فيــها الفصــول بتبوش
اتهدت الاسوار دخلوا الكلاب فى الحوش
خافوا الاســاتذه من الضـــرب والبهـدله
لما زميلهم وقع مابين صـــــــوابع بوش
عجبى !!
********************
2
يا أم الهـرم والنيل والحسن بيكـــهرب
عايش فى حضنك عليل وكأنى متغرب
بتدلعى الاغـــــراب دايمــا ونسيــانى
واحاول اهـــرب منك القــانى بتقــرب
عجبى !!
*******************
3
ملايين بتصرخ من قلة الرحمه
لاطايله سمكه ولا فرخه ولا لحمه
حتى الرغيف المبعكك صعب المنال
علشان تنوله لابد الحرب فى الزحمه
عجبى !!
******************
4
ليه شكلى عــامل كــده قوليلى يا مـرايا
وشى كتــاب مفــتــوح والجسم بـــــرايه
نظرات عيون الجمال سابت فى قلبى ألم
وكل سن اتقصف ســـــاب نقطه جــــوايا
عجبى !!
********************
كلمات محمد فتحى السيد
اكشــــــــــن

على جسر القصيده

على جسر القصيده
********************
لما العروض اختفت وغرقت البحور حبيت اطيييييييييير
بدل ما امشى ع الرمل واكون عنيد
واشرب من البحر المديد
لفيت بعيد وتوهت فى دروب الأدب
بين الحداثه والقديم مكانى فين ؟؟؟؟؟؟؟؟؟؟
حسيت الغربه سرقانى
رجعت تانى للبسيط
كأنى نقطه فى المحيط
جيش الحداثه هجم
برج الخليل اترجم
اتسربت منى القوافى
وماشى حافى على جسر القصيدة
شاروت عقلى غيرت جلدى
ودعت كل الأعمده
ورحلت م البحر الطويل
على سفينة العولمه
______________
كلمات
محمد فتحى السيد

سيف ع الرف

مذكرات سيف

____________

من الألف للياء حروف متبعتره

عدادها راجع ورا

الضلمه خنقانى والشمس هربانه

من حطين وانا فى الطين

مسجون فى باترينه ع الرف للزينه

احشائى عطشانه العوره مكشوفه والحلم متبخر

صورتى كلها عزه لكن قديمه

صورتى الجديده فيها النقطه مفقوده

نفسى اهرب واضرب اضرب

اقطع رقاب كل الكلاب لو حتى اتكسر

خايف اصدى من غير تصدى

عمرى يفوت وانا هلفوت

مخلوط هوايا بريحة الموت

_____________

كلمات محمد فتحى السيد

لسه بتفرعن

لسه بتفرعن

__________

امون مطحون على خفرع

ومنقرع مديون فى حزمة البردى

ع الضهر حمل تقييييل حط الحبين فى الأرض

النهر شق الخد .. توت عنخ بيعيط

العين متكحله بالزيف جوه الودان تخاريف

بين الحواجب خوفو حاجب الصوره الأنف مكسوره

طرح اللسان صبار على شفه متشققه

نايمه السواقى ف العسل والنبض واقف ع الهاويس

واحد يغيث رمسيس

رهنوا مسلاته ومن الميدان طردوه

***************

حورس مع الكورس بيغنى للعازفات

فينك يا موحد القطرين ؟؟

سايب نفرتارى تلعب ( اتارى )

ع المينا مينا مستنى المعونه

***************

ايزيس مع اوزيريس الابره جنب الخيط

لا لحد يتأجر ولا توابيت

كل المقابر كومبليت

**************

أحمس ادمن كليوباتراوحتشبسوت محتاجه للقطره

ف علبه البيفى عالم هيروغليفى

بيذيعوا من حنطورتايه رغيف حتحور

وحور على الحافه

يامنف ف الكفه الوزن قل كتييييييييييير

سبع تلالالالالالاف كيلو ولسه بتفرعن

_________________

كلمات محمد فتحى السيد

(اكشن)

سكوت ح نصور

سكوت ح نصور

تم نشر هذا النص بجريدةاخبار الأدب منتصف 2006

و تصدرها اخبار اليوم كل اسبوع

**************************

سكوت ح نصور

كلاكيت

اكشن اول مره

سنانير بتغمز فى الممنوع

وشراع المركب مخلوع

ودراع القبطان مقطوع

فى البحر أغانى الفيديو كليب سودانى ولب

تايهين فى ستاير حمراوازايز بيره وخمره

الموج شايل مايوهات

ع الرمله فخاد ونهود ستات

وحاجات مالهاش لزمهالرقابه حذفتها

stop

سكوت ح نصور

كلاكيت

اكشن تانى مره

شباب جايين طايرين من ركن الكون

واخدين تصريح من مونيكا

لحماية النجمه الساقطه فى الهيش العربى

stop

سكوت ح نصور

كلاكيت اكشن تالت مره

سرطان الأوسط بيزيد

كلاب بتبيد حكام وعبيد

جنازات النمل طابوووووووووورعلى باب الاقصى

الموت بريموت الزيت مشفوط

خنازير بتحاكم برغوت

غرقنى طوفان الدم

وسحبنى الهم لقعر الكون

عفاريت اعلام طلعت لى

غنت لى

فرفش أربع عفرخلى همومك تتشفر

عبى الجردل من اوجاعك فضى دماغك

وارمى الجردل بره الكون

stop

سكوت ح نصور

كلاكيت

اكشن رابع مره

فتحت دماغى

نطت اوجاعى فى حجرى قروض ميسره

صناديق سوده بالصودا

قرارات مدفونه فى لحد

اتنين ــ اربعه ــ اتنين

كراتين لحوم مستورده م البوسنه والشيشان

وبلاد كتيييييييرماركة << لا اله الا الله >>

كرتونه انفجرت من غزه سقطت اشلاء

على عضم من البصره وكبد وقوانص اطفال

stop

سكوت ح نصور

كلاكيت

اكشن خامس مره

عيون الدنيا معصوبه والكفه مقلوبه فوق السكوت

والصمت موت

الموت بيسقط م الاباتشى والكروز

الارض احمر فى روز

الجثث زى الكازوز من غير تمن

العز ـــــــــــــ وز والف كنز تحت بيادات المارينز

تروس بتفرم البشر

فى الشوارع فى المساجد فى البيوت

الصمت موت

stop

عفوانلتقى فى الغزو القادمـ

تمت بحمد الله

__________________

الشاعر المصرى محمد فتحى السيد

<< اكشــــــــــــــــــــــــن >>